Namibië het sy vaste posisie ter verdediging van trofeejag herbevestig en gewaarsku dat toenemende druk van internasionale, ideologiese groepe gekant teen jag die land se suksesvolle kommunale bewaringsprogramme en breër bewaringspogings bedreig.
In reaksie op vrae wat in die parlement oor trofeejag geopper is, het die minister van die omgewing, bosbou en toerisme, Indileni Daniel, gesê Namibië se bewaringsmodel is gebou op die beginsel van volhoubare benutting en sal nie deur eksterne druk voorgeskryf word wat hierdie benadering ondermyn nie.
Daniel het gesê die groeiende oproepe van organisasies gekant teen jag om trofeejag te verbied, hou ’n ernstige risiko vir die land se bewaringsuksesse in, veral binne kommunale bewaringsgebiede waar wildbestuur en landelike lewensbestaan nou verweef is.
“Namibië sal voortgaan om hierdie druk teen te staan,” het sy gesê. Sy het benadruk dat die land daartoe verbind bly om te verseker dat sy praktyke vir wildbestuur geloofwaardig en verdedigbaar bly.
KWOTAS
Om deursigtigheid en wetenskaplike geloofwaardigheid te versterk, is die proses vir die vasstelling van kwotas vir bewaringsgebiede en nasionale parke in 2018, in oorleg met belanghebbendes, krities hersien en aangepas.
Onder die hersiene stelsel word ’n sterker klem gelê op wetenskaplik bepaalde, data-gebaseerde kwotas.
Toesig word verskaf deur die koördineringskomitee vir kwotavasstelling, wat tegniese personeel van die ministerie insluit, asook verteenwoordigers van nieregeringsorganisasies wat by bewaring betrokke is.
Die vasstellingsproses vir kwotas word daarna uitgebrei na kommunale bewaringsgebiede en nasionale parke, wat hulle in staat stel om insette te lewer en tot ’n ooreenkoms te kom voordat finale kwotas aan die minister vir goedkeuring aanbeveel word.
Daniel het beklemtoon Namibië sal voortgaan om eksterne druk te weerstaan, terwyl dit volle verantwoordelikheid behou vir die vasstelling van verdedigbare en volhoubare jagkwotas.
Sy het gesê hierdie kwotas moet gegrond wees op betroubare data oor wildgetalle en volgens deeglike oorleg met kommunale bewaringsgebiede deur spesialiste en ander relevante belanghebbendes ontwikkel word.
Volgens die minister is die handhawing van hierdie wetenskaplik gebaseerde en konsultatiewe benadering noodsaaklik om te verseker dat Namibië se bewaringsmodel sowel volhoubaar as internasionaal verdedigbaar bly, terwyl die belange van gemeenskappe beskerm word wat op wild as ’n sleutelbron staatmaak.
– ellanie@nmh-hub.com.na
