’n Totaal van 40 renosters is verlede jaar gestroop, terwyl vier olifante deur stropers afgemaai is – n beduidende afname in vergelyking met vorige jare.
Dit is bevestig deur Bennett Kahuure, die direkteur van wildlewe en nasionale parke in die ministerie van die omgewing, bosbou en toerisme . Hy het bygevoeg dat daar tot dusver vanjaar slegs een geval van renosterstropery aangemeld is en geen olifant is gestroop nie.
“Algeheel was daar oor die afgelope paar jaar ’n afname in die aantal stroperygevalle,” het Kahuure gesê. Namibië het in 2024 een van sy slegste jare vir renosterstropery in meer as ’n dekade beleef, met 81 renosters wat onwettig gejag is," het Kahuure gesê.
="ltr">"Owerhede het 77 verdagtes vir renosterverwante misdade in hegtenis geneem, waarvan 73 Namibiese burgers is. Volgens ’n dokument wat Namibië by die 78ste staande komitee-vergadering van die Verenigde Nasies se Konvensie oor Internasionale Handel in Bedreigde Spesies van Wilde Fauna en Flora (Cites) in Genève, Switserland, ingedien het, het Namibië se stroperykrisis in 2015 ’n hoogtepunt bereik toe 97 renosters gestroop is. Dit is gevolg deur 84 gevalle in 2018, en in 2022 met 94 gestroopte renosters.
Owerhede het in 2024 altesaam 14 renosterhorings gekonfiskeer, vergeleke met 21 in 2023. Wetstoepassers het ook op 15 vuurwapens beslag gelê, asook op ses voertuie wat met stropery-aktiwiteite verbind is. Van die 77 verdagtes wat gearresteer is, was 59 ten tyde van beriggewing steeds in aanhouding, terwyl 18 op borgtog vrygelaat is. Die meerderheid van die gearresteerdes is Namibiese burgers, met vier Angolese wat na bewering met smokkelnetwerke verbind is. Olifantstropery toon ook ’n dalende tendens. Volgens die Namibië Nasionale Wildbeskermingsverslag vir 2024 is nege olifante gestroop aangeteken en beslag is op 31 olifanttande gelê – meestal afkomstig uit ander lande.
Altesaam 32 verdagtes is in 2024 in verband met olifantstroperygevalle in hegtenis geneem, hoofsaaklik vir die handel in ivoor wat buite Namibië ontstaan het.
Syfers beklemtoon ’n afname oor die onlangse jare: Agt olifante is in 2023 gestroop, vier in 2022, tien in 2021, 12 in 2020, 13 in 2019, 27 in 2018, 50 in 2017 en 101 in 2016.
– ellanie@nmh-hub.com.na
