Kommersiële boer Johannes Esterhuizen is aangewys as Meatco se 2025 Produsent van die Jaar en staan aan die voorpunt van 'n groep uitstaande veeprodusente wat vir uitnemendheid in die verskaffing van premiumgehalte-beeste aan Namibië se uitvoerbeesvleisbedryf vereer is.
Esterhuizen het die titel Produsent van die Jaar – Kommersieel en 'n kontantprys van N$30 000 ontvang, terwyl Jacobus de Klerk as naaswenner aangewys is en N$12 000 ontvang het.
Die jaarlikse Meatco Produsent van die Jaar-toekennings, wat Vrydag in Windhoek gehou is, vereer boere wat konsekwent aan die korporasie s
e streng gehaltevereistes vir vee voldoen, insluitend bouvorm, vetgraad en ouderdom. Die toekennings erken ook produsente wat, ondanks Namibië se uitdagende semi-ariede boerderytoestande, voortgaan om beesvleis van hoë gehalte te lewer.
Ander kategoriewenners is Robert Hauwanga, wat die kategorie Kommunale Produsent – NCA Rundu gewen het; Liyemo Mbangweta, aangewys as Kommunale Produsent – NCA Katima Mulilo; Alfons Kahuure, wenner van die kategorie Kommunale Produsent – Suid van die Veterinêre Kordonheining (SVCF); en Hallie Investment No. 573 CC, verteenwoordig deur Salomo Hei, wat die toekenning vir Opkomende Kommersiële Produsent ontvang het.
Die naaswenners was Mutesi Ngangami (NCA Rundu), Mutesi Albert Ngangami (NCA Katima Mulilo), Agustinius Kaunuua (SVCF) en Erickson Eheeno Haikela (Opkomende Kommersiële Produsent). Wenners in die kommunale en opkomende kategorieë het elk N$18 000 ontvang, terwyl die naaswenners N$12 000 elk ontvang het.
Meatco se interim-uitvoerende hoof, Albertus Aochamub, het tydens die seremonie gesê die toekennings erken produsente wie se toewyding aan gehalte Namibië in staat stel om mededingend in premium internasionale beesvleismarkte te bly.
"Ons veeprodusente is die ruggraat van Namibië se beesvleisbedryf en die fondament van Meatco se sukses. Hul toewyding aan gehalte, konsekwentheid en volhoubare produksie stel Namibië in staat om sy reputasie as 'n vertroude verskaffer van premiumbeesvleis aan die wêreld te handhaaf. Vandag vier ons hul uitnemendheid en bedank ons hulle vir hul volgehoue vennootskap," het hy gesê.
FeedMaster Namibia was die hoofborg van die toekennings en het N$42 000 tot die kommersiële kategorie bygedra. Bykomende borgskap van N$30 000 per kategorie is deur die Vee- en Veeprodukteraad van Namibië (LLPBN), Bank Windhoek en Meatco verskaf.
