Die Namibië Universiteit van Wetenskap en Tegnologie (NUST) se raad het die verskuiwing van sy landbou-satellietkampus van Rietfontein na Otavi in die Otjozondjupastreek goedgekeur.

Die besluit volg op ’n resolusie wat tydens ’n raadsvergadering op 6 Februarie 2026 aanvaar is, waarin Otavi as die nuwe ligging bekragtig is. Hierdie verskuiwing is deel van NUST se breër strategiese doelwit om toegang tot hoër onderwys uit te brei, nasionale ontwikkelingsprioriteite te ondersteun en die transformasie van plattelandse dorpe in kennis- en innovasie sentra te bevorder.

Voorts volg die skuif op ’n kabinetsbesluit om nasionale ontwikkeling te ondersteun in 'n streek met ’n bevolking van meer as 143 000. Die meer as 80 skole in die streek bedien meer as 48 000 leerders, wat tans beperkte toegang tot universiteitsvlakonderwys het. Die verskuiwing na Otavi sal help om hierdie gaping aan te spreek, terwyl dit ook die oorgang van sekondêre en beroepsonderwys na tersiêre onderwys versterk.

Otavi se ligging verbeter verder sy geskiktheid weens beter toeganklikheid vir studente oor ’n wye geografiese gebied.

Die Otavi-dorpsraad het reeds grond toegeken vir die vestiging van die satellietkampus. Die verskuiwing van studente en personeel sal in fases geskied. Dit sal begin met die voorsiening van tydelike fasiliteite om onmiddellike akademiese aktiwiteite te ondersteun, tesame met die beplande ontwikkeling van ’n permanente kampus.

Hierdie gefaseerde ontwikkeling sal die kontinuïteit van onderrig verseker, terwyl die grondslag gelê word vir ’n volledig toegeruste landboukampus wat onderrig, navorsing en innovasie ondersteun.